ಕೊರೊನಾ ವೈರಸ್ ಲಾಕ್‌ಡೌನ್‌ನಿಂದ ಸಂಕಷ್ಟ: ಪತ್ರ ಬರೆದಿಟ್ಟು ಚಾಲಕ ಆತ್ಮಹತ್ಯೆ

ಬೆಂಗಳೂರು: ಕೊರೊನಾ ವೈರಸ್ ಲಾಕ್‌ಡೌನ್‌ ಸೃಷ್ಟಿಸಿರುವ ಅನಾಹುತಗಳು ಒಂದೆರಡಲ್ಲ. ಮನೆಯಿಂದ ಹೊರಗೆ ಬರುವಂತಿಲ್ಲ, ಮಾಡುತ್ತಿದ್ದ ಕೆಲಸವೂ ಇಲ್ಲ. ಹೀಗಾಗಿ, ಅಂದಿನ ದುಡಿಮೆಯನ್ನೇ ನೆಚ್ಚಿಕೊಂಡವರು, ತಿಂಗಳ ಸಂಬಳದ ಮೇಲೆ ಆಧಾರ ಆಗಿರುವ ಬಹುಸಂಖ್ಯಾತ ಮಂದಿ ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಲಾಕ್‌ಡೌನ್‌ ಕಾರಣದಿಂದ ದುಡಿಮೆಯೇ ನಿಂತುಹೋಗಿ ಸಂಸಾರ ನಡೆಸುವುದೇ ಕಷ್ಟವಾಗಿದೆ ಎಂದು ಸಂಕಷ್ಟವನ್ನು ಪತ್ರದಲ್ಲಿ ಬರೆದಿಟ್ಟಿರುವ ಕ್ಯಾಬ್‌ ಚಾಲಕರೊಬ್ಬರು, ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ರಾಮಮೂರ್ತಿ ನಗರ ಪೊಲೀಸ್‌ ಠಾಣೆ ವ್ಯಾಪ್ತಿಯ ಕ್ಯಾಬ್‌ ಚಾಲಕ 38 ವರ್ಷ ವಯಸ್ಸಿನ ಮಣಿ ಆತ್ಮಹತ್ಯೆ ಮಾಡಿಕೊಂಡವರು.

''ಲಾಕ್‌ಡೌನ್‌ ಕಾರಣದಿಂದ ದುಡಿಮೆ ನಿಂತು ಹೋಗಿದೆ. ಈಗ ಲಾಕ್‌ಡೌನ್‌ ತೆರವಾದರೂ ಮತ್ತೆ ಮೊದಲಿನಂತೆ ದುಡಿಮೆಯೇ ಆಗುತ್ತಿಲ್ಲ. ಇದರಿಂದ ಊಟಕ್ಕೂ ಕಷ್ಟ ಆಗಿದೆ. ಸಂಸಾರ ನಿಭಾಯಿಸುವುದು ಹೇಗೋ ಗೊತ್ತಾಗುತ್ತಿಲ್ಲ. ಹಣದ ಸಮಸ್ಯೆಯಿಂದಾಗಿ ಮನೆಯಲ್ಲಿ ಜಗಳ ನಡೆಯುತ್ತಿದೆ'' ಎಂದು ಕ್ಯಾಬ್‌ ಚಾಲಕ ಮಣಿ ಅವರು ತಮ್ಮ ಮರಣ ಪತ್ರದಲ್ಲಿ ನೋವನ್ನು ತೋಡಿಕೊಂಡಿದ್ದಾರೆ. ಇದೇ ಕಾರಣಕ್ಕೆ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ.

ಕಂಬಿ ಎಣಿಸುವಂತೆ ಮಾಡ್ತು ಕಮೀಷನ್ ಆಸೆ..! 1 ಕೋಟಿ ರೂ. ಎಟಿಎಂ ಹಣ ಕದ್ದವರು ಅಂದರ್..

ಆರ್ಥಿಕ ಸಂಕಷ್ಟ ಮತ್ತು ಕೌಟುಂಬಿಕ ಸಮಸ್ಯೆಯಿಂದ ಕ್ಯಾಬ್ ಚಾಲಕ ಆತ್ಮಹತ್ಯೆ ಮಾಡಿಕೊಂಡಿದ್ದಾಗಿ ಗೊತ್ತಾಗಿದೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ. ಶವ ಪರೀಕ್ಷೆ ವರದಿ ಬಂದ ಬಳಿಕ ಪತ್ನಿಯ ಹೇಳಿಕೆ ದಾಖಲಿಸಿಕೊಂಡು ತನಿಖೆ ಮುಂದುವರಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.

ಕೊರೊನಾ ವಾರಿಯರ್ ಕೊರಳಲ್ಲಿದ್ದ ಚಿನ್ನ ಕಿತ್ತುಕೊಂಡಿದ್ದ ಕಿರಾತಕರು ಅಂದರ್..

ಲಾಕ್‌ಡೌನ್‌ ನಿಧಾನವಾಗಿ ಸಡಿಲಿಕೆಯಾಗುತ್ತಿದೆ. ಆರ್ಥಿಕ ಚಟುವಟಿಕೆಗಳು ಮೊದಲಿನಂತೆಯೇ ಗರಿಗೆದರಲಿವೆ. ಹೀಗಾಗಿ, ಭವಿಷ್ಯದ ಬಗ್ಗೆ ಭಯಪಡದೆ ಧೈರ್ಯವಾಗಿ ಸನ್ನಿವೇಶ ಎದುರಿಸಬೇಕಾದ್ದು ಈ ಹೊತ್ತಿನ ಅನಿವಾರ್ಯತೆ. ಮಧ್ಯಮ, ಕೆಳ ಮಧ್ಯ ಹಾಗೂ ಬಡ ಜನರೇ ಬಹುಸಂಖ್ಯಾತರಾಗಿರುವ ದೇಶದಲ್ಲಿ, ಸಂಕಷ್ಟ ತಮ್ಮೊಬ್ಬರಿಗೆ ಮಾತ್ರ ಬಂದಿಲ್ಲ ಎಂದು ಅರಿತು, ಧೃತಿಗೆಡದೆ ತಾಳ್ಮೆಯಿಂದ ಮುನ್ನುಗ್ಗಬೇಕಿದೆ.

ರಸ್ತೆ ರಂಪಾಟಕ್ಕೆ ಹೈರಾಣಾದ ದಂಪತಿ..! ರಕ್ಷಣೆಗೆ ಧಾವಿಸಿದ ಯುವಕನಿಗೂ ಪುಂಡರಿಂದ ಏಟು..!